Connect with us

Sharhi

Rikicin Aisha Buhari da mukarraban Shugaban kasa: Yaushe wuta zata tsagaita?

Published

on

Tun a shekarar 2016 ne uwargidan shugaban kasa Aisha Muhammadu Buhari ta fara bayyana rashin jin dadin ta game da wadanda ta bayyana ’yan bani na iya suka hana ruwa gudu a gwamnatin da mijinta kuma shugaban kasa Muhammadu Buhari ke jagoranta.

Aisha Buhari wacce a yanzu shekaru talatin kenan da suka yi aure da shugaban kasa Muhammadu Buhari bayan rabuwar da yayi da marigayiya tsohuwar uwargidan sa Hajiya Safinatu ta cigaba da kin boye abunda ke damun ta game da yadda wasu ke katsalandan a tafiyar da al’amuran na Najeriya.

Masu sharhi akan al’amuran yau da kullum sun banbanta akan irin yadda maidakin na shugaban kasa ke bayyana ra’ayinta a game da tafiyar da gwamnati da shugaba Muhammadu Buhari ke yi , inda wasu ke ganin cewa tayi dai dai da bayyana rashin jin dadinta da kuma kokarin kawo gyara.

 

Amma wasu na ganin duba da yadda al’ada da addinin mutanan arewacin kasar nan yake, bai kamata Hajiya Aisha Muhammadu Buhari ta rika bayyana gazawar mijinta a kafafan yada labarai ba domin ita mace ce da ta ke da aure wanda matan musulmi basa bayyana a bainar jama’a sai hakan ya zama dole.

Ko a shekarar 2016 da Aisha Buharin ta nuna cewa wasu ne suka karbe ragamar mulkin Najeriya suke yin abunda suke so , bayan bayyanar bayanan nata a kafar yada labarai ta BBC sai da aka tambayi shugaban kasa Muhammadu Buhari cewa yaya zai bayyana mai dakinsa.

Tunda cikin harshen turanci ya bayar da misalin sai shugaba Buhari yace shi dai abunda ya sani tsakanin sa da mai dakin sa shi ne tana dakinsa da gurin dafa abinci da kuma wani dakin daban.

Hakan yasa jama’a da dama suka rika mamakin na martanin da Shugaba Muhammadu Buhari ya mayar akan caccakar da matar sa tayi wa gwamnatin ta sa.

Duk da haka tun fara dambarwar ,Shugaba Muhammadu Buhari bai taba mayarwa da Aisha Muhammadu Buhari martani akan caccakar da take yi na salon tafiyar da mulkin nasa ba.

Tun sanda ta fara ganin al’amura basa tafiya daidai  a gwamnatin ta Shugaba Buhari wanda ita Hajiya Aisha take ganin talakawa ne suka sha wahala wajen samun nasara amma wasu ‘yan tsiraru suka mamaye da karbe iko kuma take ganin cewa talakawan basu amfana ba ko kadan.

Akwai ma wasu lokuta da Hajiya Aisha Buhari ta bayyana cewa asibitin dake fadar shugaban kasa babu cikakkun kayan aiki da zai kula da marasa lafiya ballantana sauran asibitocin kasar nan.

Tarihin bayyanar Aisha Buhari

‘Yan Najeriya sun fara ganin Aisha Muhammadu Buhari ne a zaben shekarar 2015 lokacin da shugaba Buhari ya amince da ta shiga yakin neman zaben sa .

Amma da shugaban kasa Muhammadu Buhari ya fito takarar shugaban kasa a shekarar 2003 da 2007 da 2011 ’yan Najeriya da dama da kuma magoya bayan shugaban basu san Aisha Muhammadu Buhari ba har sai lokacin zaben shekarar 2015.

Abunda ya bullo a satin nan

Kwatsam a ranar larabar da ta gabata sai ga shi uwargidan shugaban kasa ta zargi mai taimakawa shugaban kasa Muhammadu Buhari na musammman akan harkokin yada labarai da fuska biyu wajen gudanar da ayyukan sa.

Aisha Buhari ta bayyana cewa Malam Garba Shehu yana bin umarnin Mamman Daura ne ba na mijinta ba.

A zargin da tayi  tace Mamman Daura ya umarci Garba Shehu da cire ‘’yan jaridun da suke aiki  a ofishin mai dakin shugaban kasa da aka fi sani da First lady.

Yaushe rikicin zai tsagaita?

Har ya zuwa yanzu babu wani bangare a fadar Shugaban kasa ko shi Malam Garba  Shehu ko  Mamman Daura da ya mayar da martani.

Ko wane dabaru shugaba Buhari zai dauka na takaita maganar da ta shafi tafiyar da mulki da maidakin sa take yi ga manema labarai a shekaru uku da suka wuce.?

Manyan Labarai

2023: Gadar Ganduje a APC Barau ko Gawuna?

Published

on

Bayan kammala zaben shekarar 2019 ne wasu gwamnonin kasar nan zasu kammala wa’adin su akan karagar mulki kamar yadda tsarin mulkin Najeriya ya tanadar musu.

Daga cikin wadannan Gwamnoni da ake sa ran zasu kammala mulkin su zango na biyu a shekarar 2023 akwai gwamnan Kano mai ci a yanzu Dr Abdullahi Umar Ganduje.

Daga ranar 29 ga watan Mayun shekarar 2023 tayi ana sa ran Gwamna Ganduje zai mika ragamar mulkin jihar Kano ga duk wanda Allah madaukakin sarki ya zaba.

Amma duk da haka ita kujerar gwamnan jihar Kano kujera ce da manya da kananan ‘’yan siyasa ke zawarcinta sakamakon tagomashi da kujerar ta gwamnan Kano take da shi tun sanda aka kirkiri jihar a ranar 27 ga watan Mayu na shekarar 1967.

Tun dawowa Najeriya mulkin dumkradiyya a ranar 29 ga watan Mayu na shekarar 1999 Gwamna Abdullahi Umar Ganduje shi ne mutum na uku da ya samu damar mulkar jihar Kano a tsarin na dumkradiyya.

A zaben shekarar 2015 tsohon gwamnan jihar Kano Injiniya Rabiu Musa Kwankwaso ya tsayar da tsohon mataimakin sa Dr Abdullahi Umar Ganduje a matsayin wanda zai gaje shi daga tsagin Kwankwasiyya.

Mataimakin Gwamnan Jihar Kano Nasiru Yusuf Gawuna

Dr Abdulllahi Umar Ganduje yayi nasarar zama Gwamnan Jihar ta Kano a zaben ranar 11 ga watan Afrilu na shekarar ta 2015 daga bisani Injiniya Rabiu Musa Kwankwaso ya mika masa mulki a ranar 29 ga watan Mayu na shekarar ta 2015.

Tun baa je koina ba sai dangantaka tayi tsami tsakanin aminan siyasar guda biyu sakamakon zargin da gwamnatin Abdullahi Umar Ganduje tayiwa tshon gwamnan Kano Rabiu Musa Kwankwaso da rashin ladabi lokacin da yazo yin ta’aziyyar rasuwar mahaifiyar gwamna Abdullahi Umar Ganduje wacce Allah yayiwa rasuwa a watan Maris na shekarar 2019.

Wannan rikici da yaki ci yaki cinyewa shi ne ya sa tsohon gwamnan na Kano Injiniya Rabiu Musa Kwankwaso ya tattara ya nasa ya nasa shi da mukarrabansa suka yi hijira zuwa tsohuwar jam’iyyar sa ta PDP.

An shiga zaben shekarar 2019 inda a zagaye na farko dantakarar jamiyyar PDP Abba Kabiru Yusuf kuma siriki ga injiniya Rabiu Musa Kwankwaso ya kayar da Gwamna Abdullahi Umar Ganduje, sai da aka tafi zagaye na biyu ne shi kuma Gwamna Abdullahi Umar Ganduje ya kayar da dantakarar jamiyyar ta PDP Abba Kabiru Yusuf.

Gwamna Ganduje na jagorantar kwamitin binciken rikicin siyasar jihar Edo

Shekarar 2023: Mecece makomar Takai a siyasar Jahar Kano?

Jim kadan bayan rantsar da Gwamna Abdullahi Umar Ganduje a karo na biyu ne siyasar jihar Kano ta sake salo.

Gwamna Abdullahi Ganduje ya kirkiri karin masarautu hudu a jihar Kano daga  masarautar Kano.

Masu sharhin al’amuran yau da kullum suna ganin yayi hakan ne domin bakantawa ‘’yan birni saboda kin zabar sa da suka yi a shekarar 2019.

Tunda Gwamna Ganduje zai kammala wa’adinsa ne a shekarar 2023 masu nazari suna ganin sanatan Kano ta arewa wato yankin da gwamna Ganduje ya fito shine tauraruwar sa take haskawa.

Masana lamuran na siyasa sun alakanta hakan ne saboda yawancin Gwamnoni dake kammala wa’adin mulkinsu na biyu suna sha’awar komawa majalisar dattijai domin a cigaba da damawa da su a siyasar kasa da ta jihar su.

Akwai Gwamnoni irin su Jonah Jang da Umaru Tanko Almakura da Kashim Shettima da Aliyu Magatakarda Wamakko da dukkansu suna majalisar dattijai.

Wasun su musanya suka yi ta kujerar Sanata da na yankunan su.

To haka ma anan Kano ake ganin Gwamna Ganduje zai iya musanyawa Sanata Barau da takarar Gwamna a jamiyyar APC domin shi ya tafi ya wakilici Kano ta Arewa a majalisar dattijai domin shi ma a cigaba da damawa dashi a siyasar jihar Kano.

Amma shima mataimakin gwamnan Kano na yanzu Alhaji Nasiru Yusuf Gawuna wanda wasu suke ganin shine Goodluck Jonathan na Kano ba zai ki neman wannan Kujerar ba sakamakon yadda yake da tagomashi na siyasa.

Alhaji Nasiru Yusuf Gawuna dai ya taba yin shugaban karamar hukumar Nassarawa har sau biyu a gwamnatin ANPP sannan yayi kwamishinan noma a karshen gwamnatin injiniya Rabiu Musa Kwankwaso.

Jagorancin siyasar birnin Kano: Sha’aban Sharada ko Mukhtar Ishaq Yakasai?

Sarkin Muslim ya bukaci gwamnatin tarayya samar da hanyoyin dakili matsalolin siyasa da addinai

Haka da Dr Abdullahi Umar Ganduje ya zama gwamna a shekarar 2015 Nasiru Gawuna ne mutum daya tilo daga tsohuwar Gwamnatin Rabiu Musa Kwankwaso da ya sake zama kwamishina a gwamnatin Dr Abdullahi Umar Ganduje.

To amma ba’a nan gizo yake saka ba ,zaben shekarar 2023 zai banbanta da sauran zabuka inda ake ganin ‘’yan birni zasu taru a bayan nasu su zaba sakamakon raba masarauntar Kano da gwamnati tayi.

Ba kasafai gwamnoni ke san mataimakan su su gaje su a mulki  ba,saboda suna ganin bijirewa daga wajen su.

Amma  gogewa da yan siyasar biyu suke da shi wato Nasiru Yusuf Gawuna tare da Sanata Barau Jibril za’a goga wajen wanda jamiyyar ta APC zata tsayar takar muddin kowannen su ya nuna sha’awar sa ta zawarcin kujerar gwamnan ta jihar Kano.

 

 

Continue Reading

Manyan Labarai

Buhari, Zulum, Kwankwaso, El-Rufai- Wa Nigeria ta fi bukata a cikinsu?

Published

on

Daga Abdullahi Isah.

Ko da ya ke idan aka bi tsarin da kasar nan ke bi ta karba-karba bako shakka yankin Arewa ba zai yi mafarkin sake komawa mulki a shekarar dubu biyu da ashirin da uku ba (2023) saboda kokari da al’ummar daya bangaren kasar nan za su yi wajen ganin mulki ya koma garesu.

Duk da cewa sanannen abune wannan batu na karba karba tsakanin kudu da Arewa ba tsari bane da ke cikin kundin tsarin mulkin kasar nan hasalima wata jamiyya ce ta amince da hakan a matsayin maslaha.

Sai dai Kuma bako shakka yanzu lamarin ya wuce yadda kowa ke tsammani don a duk lokaci da wani bangare ya gama zangon Shekaru 8 sannan ya nemi ya zarce to akan fuskanci matsaloli da dama.

Amma tunda batu ne na siyasa ba za a ce sam har abada hakan bazai taba canjawa ba saboda a siyasa komai na iya faruwa musamman ganin cewa wannan bangare bai samu goyon bayan kundin tsarin mulkin kasar nan ba.

To koma menene Allah shi ne masanin kome zai faru Shekaru hudu masu zuwa, amma alal misali idan ya kasance wannan tsarin ya wargaje sannan ‘yan siyasa su ka bai wa kowane bangare na kasar nan ya nemi mulkin kasar nan, akwai mutane uku wadanda ake kallon su cikin masu karancin Shekaru da Kuma ake musu kallon hazikai wadanda matukar aka basu dama wajen mulkin kasar nan, za su yi abin azo a gani.

Shugaba Buhari dai sanan nen abune daga shekarar dubu biyu da ashirin da uku zai bar mulkin kasar nan gudunmawa da ya bayar kuwa watakila sai karshen mulkin sa za a tantance hakan.

Saboda haka za mu fi ma i da hankali kan mutane uku wato gwamna Babagana Umara Zulum na jihar Borno da takwaransa na jihar Kaduna Malam Nasir El-Rufai da Kuma tsohon gwamnan jihar Kano Engineer Rabi’u Musa Kwankwaso, wadanda sune ‘yan siyasa daga Arewacin kasar nan da a yanzu ake ganin tauraruwar na haskawa.

Farawa da gwamnan jihar Borno Farfesa Babagana Umara Zulum, wanda Injiniya ne kan harkokin noma a jami’ar Maiduguri da ke jihar Borno kafin shiga harkokin siyasa. Babagana Umara Zulum, tun bayan rantsar da shi a matsayin gwamna na jihar Borno tauraruwar sa ke ta haskawa ba wai a jihar sa ta Borno ba kawai ko Arewacin Najeriya.

 

Yanzu lamarin ya kai al’ummar kasar nan daga kowane bangare yaba irin salon mulkin sa suke musamman wajen nuna damuwa da halin da talakawan jihar Borno ke ciki.

Gwamna Babagana Umara Zulum a yanzu ya zama dan mowa tsakanin alummar kasar nan cikin kankanin lokaci, wanda yanzu hankula sun karkata gareshi kowa sai fatan alheri ya ke masa tare da kiraye-kirayen neman da a tsayar da shi takara idan shugaba Buhari ya kammala wa’adin mulkin sa.

Malam Nasir Ahmed El-Rufai shine gwamna mai ci na jihar Kaduna a yanzu, ba ko shakka wannan bawan Allah tun bayan shigar sa fagen siyasa a lokacin mulkin Obasanjo ya zama abin nan da masu iya magana ke cewa Kadangaren bakin Tulu a kasheka a fasa Tukunya a kyaleka ka yi barna.

Abinda nake anan dai shi mutum da ya ke da halin ya fyadi yaro ya fyadi babba aduk lokacin da ya samu dama ba ya daga kafa ga kowa ciki kuwa har da jami’an gwamnati da ya ke musu aiki.

Malam Nasir El-Rufai ba mutum bane matsoraci Kuma ba ya shakkar daukar mataki komai dacin sa kuma ko da kuwa zai bakanta ran wasu ciki kuwa har da na gaba da shi, matukar ya yi imanin cewa abinda ya ke son yin nan daidai ne.

Kadan daga cikin tsauraran da gwamna Nasir Ahmed El-Rufai ya dauka lokacin yana ministan birnin tarayya ds Kuma yanzu da bya zama gwamnan jihar Kaduna sun hada da:

Rushe gidaje a birnin tarayya wadanda aka ginasu ba bida ka’ida ba wanda mataki ne da yanyo mishi makiya da masoya. Haka zalika El-Rufai ya dauki wani mataki wajen korar malamai da basa da kwarewar aiki a jihar Kaduna wanda shima mataki ne da ya janyo mishi makiya da Kuma masoya.

Injiniya Rabiu Musa Kwankwaso tsohon gwamnan jihar Kano ne har sau biyu Kuma tsohon Sanata Wanda Kuma ya taba zama ministan tsaro. Rabiu Musa Kwankwaso ya samu dumbin magoya baya sakamakon rawwar da ya taka wajen bijiro da ayyukan raya kasa a jihar Kano lokacin yana gwamna.

Dr Rabiu Kwankwaso daya daga cikin bangarori da magoya bayansa ke tutiya da shi shine gudunmawar sa bangaren ilimi wajen kirikiro da jihohi guda biyu mallakin jihar da wasu manyan makarantun gaba da sakandire da dama da Kuma gudanar da ayyukan raya kasa kamar du gada da tituna da sauransu.

Haka zalika bayan barinsa mulki ya ci gaba da gudanar da wasu ayyukan kamar daukar nauyin dalibai zuwa ketere don karatu da dai sauran su.

Wadannan mutane uku bako shakka sune tauraruwar su ke haskawa cikin Yan siyasa da suka fito daga yankin Arewa wadanda jama’a ke ta fatan ganin daya daga cikinsu ya damu damar mulkar kasar nan a nan gaba.

Ni dai gareni kowa daga cikinsu ya cancanta, saboda haka shawara ya rage ga jama’a su ga wa tafi cancanta cikin mutane ukun don jagorantar kasar nan a nan gaba.

Rubutu daga Abdullahi Isah

Continue Reading

Manyan Labarai

Babagana Zulum: Magajin Sardauna

Published

on

Daga Abdullahi Isa

Tun bayan da kasar nan ta dawo tsarin mulkin Dimukuradiya a alif da dari tara da casa’in da tara (1999), ban yi laifi ba inna ce kasar nan ko Kuma lardin Arewa ba a samu gwamna na wata jiha da al’amarinsa ke bai wa kowa mamaki kamar gwamnan jihar Borno Farfesa Babagana Umara Zulum ba.

Wato al’amarin wannan bawan Allah abin mamaki ne wanda kusan kowa a kasar nan ke mamaki da Kuma buga ayoyin tambayoyi daban-daban cewa wai dama a kasar nan akwai ‘yan siyasa da ke da jajircewa da sanin ya kamata da kwazo da Kuma kishin al’ummar sa irin haka.

Tabbas Wannan zance ne da al’ummar kasar nan da dama ke yi game da irin namijin kokari da Kuma sanin makamar aiki irin na gwamna Farfesa Babagana Umara Zulum na jihar Borno. Sanin halin da jihar Borno ke ciki ba wani boyayyen abubane kasancewar ta jiha da ta fi kowace jiha shan dan karen wahala sakamakon rikicin Boko Haram Wanda yayi sanadiyar raba dubban alummar jihar da wasu jihohin Arewa maso gabashin kasar nan da gidajensu, ba ya ga wadanda su ka rasa rayulansu. A lokaci irin wannan babu abinda jihar Borno ke bukata fiye da samun gwamna na gari mai tsoron wanda zai sadaukar da rayuwarsa wajen bautawa al’umma.

Addu’oi da alummar jihar Borno su ka rika yi tsawon Shekaru na fitar da su daga mawuyacin halin da su ke ciki ya amsu watakila hakan ne ya sa Allah ya turo da Babagana Umara Zulum a matsayin gwamna domin share musu hawaye.

Kafin in yi nisa cikin wannan rubutu ta kamata mu dan duba muga ko waye Babagana Umara Zulum.

An haifi Farfesa Babagana Umara Zulum a karamar hukumar Mafa da ke jihar ta Borno a alif da dari tara da sittin da Tara (1969), ya Kuma yi makaranta a garin Mafa da Monguno sannan ya halarci Jamiar Maiduguri da Kwalejin fasaha ta Ramat. Farfesa Babagana Umara Zulum, Inijiya ne a fannin noma ya kuma koyar a Jami’ar Maiduguri, sannan ya taba zama shugaban kwalejin fasaha ta Ramat.

Haka zalika gwamnan jihar na Borno ya taba zama kwamishina a ma’aikatar da ke kula da sake tsugunar da wadanda rikicin Boko Haram ya shafa, wanda mukamin da ya rike kenan na karshe kafin kasancewar sa gwamna a jihar ta Borno a zaben da ya gudana a shekarar da ta gabata.

Watakila wani zai ce bai wa Farfesa Babagana Umara Zulum wannan ma’aikata yana alaka da irin jajircewa da gaskiya irin nasa ya sa gwamnan jihar Borno na lokacin Kashim Shettima ya damka mishi wannan gagarumin aiki, wanda Kuma duk wanda ya bibiyi irin ayyukan alheri da gwamnatin jihar Borno ta gudanar wajen sake tsugunar da mutanen da rikicin Boko Haram ya shafa musamman wajen gina sababbin gidaje zai fuskanci dalilin da ya sa tsohon gwamnan ya dage wajen ganin Babagana Umara Zulum ya gajeshi.

Wani bangare da wannan bawan Allah ya yi shura shine wajen shiga lunguna da sakuna na jihar da ke fama da rikicin Boko Haram, wato ba wai zuwa kawai da ya ke yi shine abin dubawa ba, gwamnan ya kan ziyarci kauyukan sannan ya je ya zauna da al’ummomin kauyen ya kwana da su cikin kauyen . Kai! Wannan babban lamari ne da ba a taba ganin shi a kasar nan ba, ba dai wannan lokaci ba watakila sai dai a jamhuriya ta farko.

Ba wai kawai nan gwamna Babagana Umara Zulum ya tsaya ba, ya Kuma shahara wajen gudanar da ayyukan raya kasa da za su taba talaka na kasa kai tsaye, ko da ranar daya ga watan nan da muke ciki yayin da wasu gwamnonin su ke gudanar da bukukuwa wajen yin tarurruka da kashe kudaden alumma da sunan bukukuwar sabuwar shekara, shi ko gwamna Babagana Umara Zulum, ya garzaya cikin kauyuka ne wajen kaddamar da ayyukan raya kasa guda biyar wadanda gwamnatin sa ta gudanar wadana suka hada da asibitoci da aikin samar da ruwan sha.

Gamji Magajin Sardauna Farfesa Babagana Umara Zulum ya sake bai wa alummar kasar nan kan kalaman da ya yi game da tambayar sa da aka yi na yawan shiga hatsarin da ya ke wajen kutsawa maboyan Boko-haram, inda ya ce, shi bai zama gwamna don ya yi Wasa ba sai don kawai ya taimakawa alummar sa wajen rage musu radadin mawuyacin halin da su ke ciki.

”Ina tabbatar muku ko da zan rasa raiba akan wannan aiki bana haufi, domin akalla zan samu amsar da zan bayar a lahira”. Allahu Akbar! Ka ji fa. Wannan a Shekarun ba ya in aka ce za a samu gwamna irin haka a kasar nan zai yi matukar wahala jama’a su yadda, ko ni kaina da nake wannan magana zan sa ayar tambaya.

Ko da a jiya litinin shida ga watan Disamba, kallo ya koma jihar Borno batan da gwamna Babagana Umara Zulum ya tuhumi dakarun kasar nan da ke aikin samar da tsaro a jihar da rashin kyautawa wajen karbar na goro a wajen masu ababen hawa. A wani faifan bidiyo da ya yi ta yawo a kafafen sada zumunta da wasu jaridun kasar nan an hango gwamnan na Borno cikin fushi yana kalubalantar sojoji da ke wajen wani shingen binciken ababen hawa a hanyar da ta hada Maiduguri da Damaturu babbban birnin jihar Yobe. Gwamna kai tsaye ya farwa sojojin da fada yana mai cewa, ‘yanzu ku ‘yan Boko-haram suna kashe mutane ku Kuma kunanan kuna tare mutane masu ababen hawa akan hanya kuna karbar cin hancin naira dubu-dubu.

Ba ko shakka wannan namijin kokari da gwamnan ya yi wajen fallasa wannan kazamin dabi’a na wasu jami’an tsaron kasar nan ya kara farin jini ga gwamnan inda har ya kai yanzu tuni wasu su ka fara kiraye-kirayen cewa me zai hana gwamna Babagana Umara Zulum ya gaji shugaba Buhari a shekarar dubu biyu da ashirin da uku.
Koma dai me zai kasance nan gaba Allah ne masani, amma ba ko shakka Arewa a karon farko tsawon Shekaru ta samu Magajin Sardauna Sir Ahmadu Bello. Fatan mu anan sauran gwamnonin Jihohin Arewa dama na kasar nan baki daya za su yi koyi da irin wadannan kyawawan halayya na gwamnan jihar Borno, Farfesa Babagana Umara Zulum.

Rubutu daga Abdullahi Isah.

Continue Reading

Now Streaming

Trending

Copyright © 2019. Freedom Radio Group. All Rights Reserved.

error: Content is protected !!