A fara duba jinjirin watan Safar-Sarkin Musulmi

Mai alfarma sarkin Musulmin Najeriya Alhaji Sa’ad Abubakar III, ya bukaci al’ummar Musulmi da su fara duban jinjirin sabon watan Safar na bana a daga yau Lahadi 29 ga watan Satumba, wanda ya yi dai dai da 29 ga watan Muharram.

Alhaji Sa’ad Abubakar III, ya bayyana hakan ne a wata sanarwa da aka raba wa manema jabarai a jihar Sokoto wadda shugaban kwamitin bada  shawarwari kan harkokin addinin musulunci Farfesa Sambo Junaidu ya fitar.

Sanarwar ta bukaci al’ummar musulmin da suka ga jinjirin watan da su sanar da hakimansu domin sanar da fadar ta sarkin musulmi.

Mai alfarma sarkin musulmin ya kuma bukaci al’ummar musulmin da su rika taimakawa ‘yan uwansu musulmi wajen gudanar da ayyukan ibadun su yadda ya kamata.