A kawo karshen rikicin hukumar AFN – ‘Yan wasa

‘Yan wasan guje-guje da tsalle-tsalle a Najeriya sun koka kan rikicin da hukumar take fama dashi tare da yin kira ga mahukunta a hukumar da su kawo karshen rikicin don samun shugabanci na gari.

‘Yan wasan sunyi amfani da kafafen sada zumunta wajen bayyana takaicin su tare da korafi kan rashin samun walwala da jin dadi da sauran su.

An dai samu sabani tsakanin hukumar ta AFN da jami’an dake sanya idanu a harkokin wasanni daga ma’aiakatar wasanni ta kasa a yayin wani taro da aka gudanar a garin Awka dake jihar Anambra a watan Disambar bara.

Hakan ya sanya wani bangare da mataimakin shugaban hukumar Olamide George ke jagoranta yin ikirarin cewa sun dakatar da shugaban hukumar Ibrahim Shehu Gusau.

Lamarin dai ya tilastawa Shehu Gusau fadawa ma’aikatar wasannin cewa AFN hukumace mai cin gashin kanta.

Haka zalika, Gusau ya kuma shigar da kara a gaban babbar kotu dake zamanta a birnin tarayya Abuja yana kalubalantar ma’aikatar wasanni cewa har yanzu shine shugaban hukumar ta AFN a watan Yuli da ya gabata.