A koyi matakan yaki da corona daga kwalejin tsaftar muhalli – Dakta Getso

Kwamshinan muhalli na jihar Kano Dakta Kabiru Ibrahim Getso ya bukaci sauran makarantun jihar Kano da su yi koyi da kwalejin koyar da harkokin tsaftar muhalli don yaki da cutar corona.

Dakta Kabiru Ibrahim Getso ya ce matakin da kwalejin ta dauka abin alfahari ne don kuwa cikin dokokin yaki da cutar corona babu wanda suka bari a baya.

A cewar sa “matukar al’umma musamman makarantu za su dauki irin wadannan matakan babu shakka za a yaki cutar corona cikin sauki”.

A don haka ya bayyana farin cikin sa ga shugaban kwalejin Dakta Bashir Bala Getso kan irin jajircewarsa kan harkokin tsaftar muhalli.