A shirye Najeriya take a dama da ita tattalin arzikin Internet

Ministan sadarwa da bunkasa tattalin arziki ta internet Dr Isa Ali, Pantami ya ce, kasar nan a shirye take a dama da ita a  juyin juya hali a bangaren tattalin arziki na internet.

Ya kuma ce gwamnati a shirye ta ke ta yi aiki kafada da kafada da masana da ke jami’oi da sauran masu ruwa da tsaki wajen ganin an rika damawa da kasar nan a duk wata harka ta fasahar zamani.

Dr Isa Ali Fantami ya bayyana hakan ne yayin wani taro na kasa da kasa kan bunkasa fasahar sadarwa wanda aka gudanar ta kafar internet.

Haka zalika ministan ya kara da cewa daya daga cikin mataki na farko da gwamnati ta dauka don ganin ana damawa da kasar nan kan fasahar ta sadarwa shine sauya suna ma’aikatar daga ma’aikatar sadarwa zuwa ma’aikatar sadarwa da bunkasa tattalin arziki ta internet.