Akalla akwai ‘yan bindiga dubu 30 a jihohin arewa maso yamma – Matawalle

Gwamnan jihar Zamfara Bello Matawalle ya ce akwai ‘yan bindiga akalla guda dubu talatin a jihohin arewa maso yamma.

A cewar gwamnan na Zamfara akwai kuma sansanonin ‘yan bindiga akalla guda dari a dazuka dake jihohin.

Wanda a cewar sa kowane daya daga cikin sansanonin yana kunshe da ‘yan bindiga akalla guda dari uku.

Gwamnan na Zamfara wanda kwamishinan kananan hukumomin jihar Alhaji Ibrahim Magaji Dosara ya yi magana a madadinsa, ya bayyana hakan ne yayin wani taron manema labarai ranar juma’a a garin Kaduna.

Ya kuma bayyana jihohin da ‘yan bindigar suke da sansanoni da cewa sun hada da: Zamfara, Sokoto, Kebbi, Katsina, Kaduna da kuma Niger.

Gwamnan na Zamfara ya kuma ce gwamnatin tarayya ba ta da isassun sojoji da za ta iya samun galaba akan ‘yan bindigar.