Sallah : Al’umma su kiyaye da wuta – hukumar kashe gobara

Hukumar kashe gobara ta kasa ta bukaci al’ummar jihar Kano da su kiyaye sosai wajen amfani da wuta a ya yin soye-soye ko babbaka a lokacin bikin sallah.

Jami’in hurda da jama’a na hukumar a nan Kano, Nura Abdulkadir Maigida ne ya bayyana hakan a zantawarsa da Freedom Radio inda ya nemi al’ummar Kano da su yi duk mai yiwuwa wajen ganin an magance afkuwar gobara a yayin bikin sallar.

Nura Maigida ya nemi al’umma da su kaucewa yin tafiya a yayin da ake ruwan sama, maimakon hakan su rika fakewa har sai ruwan ya tsagaita.

Har ila yau, Nura Mai Gida ya ce, hukumarsu ta yi shiri na musamman domin bai wa al’umma gudummuwa a duk lokacin da aka samu afkuwar gobara ko wani hatsari.