Ambaliyar ruwa tayi awan gaba da gawarwaki a wata makabarta a jihar Yobe

Ambaliyar ruwan sama da aka shafe kwanaki a na yi, ta yi sanadiyyar ruftawar kaburbura da dama a karamar hukumar Gashua dake jihar Yobe.

Alhaji Kabiru Bulama-Bukar, Jami’in cigaban Al’umar karamar hukumar ne ya tabbatar da hakan ga manema labarai a yau Talata 13 ga watan Yulin 2021.

Ya kuma ce, an fara ruwan saman ne tun daga ranar 9 ga watan na Yuli har zuwa ranar 12 ga watan, lamarin da yayi sanadiyyar bayyana wasu gawarwaki a makabartar.

Bulama-Bukar ya ce, “Mun samu ruwan sama kamar da bakin kwarya a cikin garin Gashua, yanzu haka gine-gine da dama sun lalace kuma makabartarmu ta rufta.”

“Da zaran mun kammala tantance barnar da mutanen da abin ya shafa, za mu gabatar da rahotonmu ga Hukumar ba da Agajin Gaggawa da majalisar jihar don daukar mataki,” in ji shi.