An kaddamar da dakarun duba masu corona gida-gida

Ma’aikatar lafiya ta jihar Kano ta kaddamar da jami’an da za su rika zuwa har gida suna duba masu fama da cutar corona a kananan hukumomi 8 na kwaryar birnin Kano karkashin wani shiri na musamman da masu cutar zasu rika samun kulawa har gida.

Kwamishinan lafiya na jihar Dakta Aminu Ibrahim Tsanyawa ne ya bayyana hakan yayin kaddamar da jami’an.

Ya ce, ma’aikatar Lafiya ta lura da yadda ake samun jinkiri a yayin da aka kira jami’an da za su duba masu cutar corona, wanda haka ne ya sanya ta samar da jamia’n don samun agajin gaggawa.

Dakta Tsanyawa ya kara da cewar Ma’aikatan zasu rika duba wadanda aka killace a gidansu amma da zarar jikin ya rikice za’a kai mutum zuwa cibiyar killacewa don samun kulawa sosai.