An kama ‘yan leken asiri a jihar Katsina

Rundunar ‘yan sandan jihar Katsina ta kama wasu mutane biyu da ake zargin masu bada bayanan sirri ne ga ‘yan bindiga.

Mai Magana da yawun rundunar, SP Gambo Isah, ne ya bayyana hakan ta cikin wata sanarwa da ya fitar a jiya.

SP Gambo, ya ce wadanda ake zargin, sune Bilyaminu Ma’aruf mai shekaru 35, da Sani Umaru mai shekaru 40.

Wadanda ake zargin sun bada tabbacin cewa sun kitsa garkuwa da mutane da dama a yankin Dutsin-ma ciki har da na Amina Usman, mai shekaru 20, da aka biya naira dubu 900.