An nada laftanal janar Tukur Yusuf Buratai a matsayin jakadan Najeriya a ƙasar jamhuriyar Benin

Shugaban ƙasa Muhammadu Buhari ya naɗa tsohon babban hafsan sojan ƙasa na ƙasar nan, laftanal janar Tukur Yusuf Buratai a matsayin jakadan Najeriya a ƙasar jamhuriyar Benin.

Haka zalika shugaba Buhari ya kuma amince da tura janar Abayomi Olonisakin, tsohon babban hafsan tsaron ƙasa a matsayin jakadan na Najeriya a ƙasar Kamaru.

A yayin wani biki da aka gudanar a birnin tarayya Abuja, ministan harkokin ƙasashen waje, Geoffrey Onyeama, ya mikawa waɗanda aka naɗa takardar fara aiki.

Hakan na cikin wata sanarwa ce da ma’aikatar harkokin ƙasashen wajen ƙasar nan ta fitar.

Sai dai sanarwar ba ta yi ƙarin haske kan inda aka tura tsohon babban hafsan sojin ruwa na ƙasar nan Vice Admiral Ibok-Ette Ibas da tsohon babban hafsan sojin sama Air Vice Marshal Sadique Abubakar da kuma Air Vice Marshal Muhammad Usman, tsohon babban jami’in leken asiri na shalkwatar tsaro ta ƙasa.