An sauya ranakun rubuta jarabawar daukar aikin sababbin ‘Yan sanda

Rundunar ‘yansandan jihar Jigawa ta sanar da sauya lokacin rubuta jarabawar daukar aikin sababbin Jami’anta.

Mai magana da yawun rundunar ‘yansandan jihar DSP Lawan Shisu Adam ne, ya bayyana hakan ga manema labarai jiya asabar a birnin Dutse.

Lawan, yace a sabon lokacin da aka sanya an tsara rubuta jarabawar ne cikin kwanaki biyu a jami’ar tarayya dake Dutse, da misalin karfe 8 da 30.

Haka kuma yace wadandan zasu rubuta jarabawar a ranakun juma’a 29 ga watan Oktaba da kuma Asabar 30 ga watan Oktoban 2021, akwai bukatar su sami horo na Kwamfuyuta.