An yi wa ‘yan Nijeriya karin kudin lantarki

Hukumar kula da wutar lantarki ta Nijeriya ta amince da ƙara kuɗin wuta ga abokanan hulɗarsu da ke rukunin Band A da suke samun wuta tsawon sa’o’i 20 a rana.

Mataimakin shugaban hukumar, Musuliu Oseni ya bayyana hakan yayin taron manema labarai hukumar ta gudanar yau Laraba a Abuja.

Ya ce, a yanzu kwastamomin za su biya N225 kan kowane kilowatt sabanin a baya da suke biyan N66.

Musuliu Oseni ya kara da cewa, abokan hulɗarsu da ke samun wuta tsawon sa’a 20 a rana su ne kashi 15 cikin 100 na kwastamomin hukumar a Najeriya.

Ya kuma ce, hukumar ta kuma sauke kwastamomin da ke ajin Band A zuwa Band B masu samun wuta ƙasa da sa’o’i 20 a rana saboda rashin kamfanonin rarraba hasken lantarki na basu wutar da ta kamata.

Haka kuma, ya bayyana cewa ƙarin ba zai shafi kwastomomin da ke sauran tsarika.