An yiwa Maradona aiki a kwakwalwa

Likitan dake kula da zakaran kwallon kafar kasar Argentina Diego Maradona, ya ce, an samu nasarar kammala yi masa aiki a kwakwalwar sa.

Likitan da ya gudanar aikin Leopoldo Luque ya bayyana haka jim kadan bayan kammala aiki a wani asibiti mai zaman kansa dake a Buenos Aires babban birnin kasar ta Argentina.

Kuma ya ce, “Maradona za ya kasance a karkashin kulawar mu domin ganin komai na tafiya cikin tsari.”

Maradona mai shekara 60 ya je asibitin ne don duba lafiyar sa sakamakon rashin lafiya dake damun sa.