Annobar Amai da Gudawa tayi sanadiyyar mutuwar mutane 37 a jihar Jigawa

Babban Sakatare a ma’aikatar lafiya a jihar jigawa yace sama da mutane Talatin da Bakwai ne suka rasa rayukansu a dalilin bullar cutar amai da gudawa a wasu kananan hukumomin jihar.

Dakta Salisu Mu’azu, ya kuma ce yanzu haka akwai mutane dubu biyu da suka kwance a Asibitoci suna samu kulawa dalilin kamuwa da cutar.

Ya ce kananan hukumomin jihar tara abin ya shafa, sai dai cutar tafi kamari a kananan hukumomin Hadeja da Dutse da kirikasamma da Birnin Kudu da kuma Ringim.

Babban sakatren ya ce kusan wata biyu kenan da fara bullar cutar a jihar, kuma gwamnatin na kokarin ganin an kawo karshen annobar da ta addabi wasu kananan hukumomin jihar.