Azal: Magidanci ya rataye kansa a Kano

Wani magidanci ya rataye kansa a unguwar Sauna Kawaji da ke ƙaramar hukumar Nassarawa a Kano.

Mutumin mai suna Sabi’u Alhassan mai kimanin shekaru 62 a duniya ya rasu bayan da ya rataye kansa a ranar Laraba.

Rahotonni sun ce, lamarin ya faru ne a lokacin da matarsa ta tafi unguwa babu kowa a gida.

Wakilin Freedom Radio Shamsu Da’u Abdullahi ya halarci jana’izar marigayin da aka yi da yammacin Laraba.

Mutanen unguwar sun shaida masa cewa, basu san musabbabin da ya sanya ya rataye kansa ba.

Mun so jin ta bakin rundunar ƴan sandan Kano amma abin ya ci tura, kasancewar wayar mai magana da yawun ƴan sandan a kashe take.