Ba ni ne nake bincikar Bola Tinubu ba – Malami

Ministan shari’a kuma Atoni Janar na tarayya Abubakar Malami ya musanta cewa yana bincikar jagoran jam’iyyar APC na kasa Bola Ahmad Tinubu.

Abubakar Malami ya yi wannan jawabi ne a wata tattaunawa da gidan Talabijin na Channels.

“To amma babu wani karin haske da zan iya yi kan ko Tinubun yana fuskantar tuhuma daga hukumar yaki da cin hanci da rashawa ta EFCC ko hukumar kula da da’ar ma’aikata, kasancewar hukumomin biyu na da hurumin bincikar kowa tare da gurfanarwa a gaban Kotu” in ji Malami.

”Kamar yadda aka sani, babu wani mataki ko kuma korafi da ofishi na ya shigar gaban Kotu, game da wasu kadarori da ake dangantawa da Bola Tinubu” a cewar ministan.

A ranar 20 ga watan Nuwamban bara ne dai EFCC ta aikewa hukumar kula da da’ar ma’aikata wasika da ke bukatar cikakkun bayanai kan kadarorin da Bola Ahmad Tinubu ya mallaka.