Barcelona: Messi ke samar da kaso uku na kudaden shiga – Laporta

‘Yan takarar shugabancin kungiyar kwallon kafa ta Barcelona Joan Laporta da Victor Font sun ce hakika ya kamata albashin Lionel Messi ya wuce yadda ake biyanshi a yanzu duba da irin makudan kudaden shiga da yake samawa kungiyar.

‘Yan takarar sun bayyana hakan ne yayin tattaunawa da wata jarida ta kasar Spain kan batun kwantiragin sa.

Sun kuma ce sakamakon binciken da suka gudanar ya nuna cewa Messi yana samawa kungiyar kaso uku a jimillar kudaden shiga da kungiyar ke samu.

A yanzu haka dai kwantiragin Messi da Barcelona zai kare ne a karshen wannan kakar wasan da muke ciki ta 2021.

Laporta da Font sun kuma sha alwashin yin duk mai yiwuwa wajen ganin Messi ya ci gaba da zama a kungiyar matukar suka samu shugabancin kungiyar a zaben da za a gudanar ranar 7 ga watan Maris mai zuwa.