Buhari zai samar da guraben ayyuka miliyan biyar

Mataimakin shugaban kasa farfesa Yemi Osinbajo ya kara jaddada matsayar gwamnatin tarayya na kirkiro da guraben ayyuka akalla miliyan biyar ga al’ummar kasar nan

Farfesa Yemi Osinbajo ya bayyana hakan ne a jiya Asabar, yayin wani taro da cibiyar ‘yan kasuwa da masana’antu ta jihar Lagos ta shirya wanda aka gudanar ta kafar Internet.

Ya ce, gwamnati tana kokarin bunkasa bangaren aikin noma da samar da gidaje masu rahusa da bunkasa masana’antu wanda hakan za su taimaka gaya wajen samar da ayyukan yi ga miliyoyin ‘yan Najeriya.

Mataimakin shugaban kasar ya kara da cewa, gwamnati za ta ci gaba da samar da yanayi mai kyau ga masu sha’awar zuba jari daga ketare dana cikin gida don rage rashin ayyuka tsakanin matasa.