Corona: Ba wanda zai je Hajji sai wanda aka yiwa Rigakafi inji Saudiyya

Ma’aikatar lafiyar kasar Saudiya ta ce babu wanda zai shiga kasar da nufin aikin Hajjin bana sai wanda aka yiwa allurar rigakafin cutar corona.

Wata Jaridar kasar mai suna ‘Okaz’ ta ruwaito ministan lafiyar kasar Dr. Tawfiq Al-Rabiah na cewa, allurar rigakafin daya ne daga cikin ka’idoji na aikin Hajji a bana.

Ko a shekarar da ta gabata ta 2020 hukumomi a kasar ta Saudiya sun rage adadin maniyyata da suka halarci aikin hajjin. Inda mutane dubu daya ne kacal (1000) mazauna kasar ta Saudiya suka gudanar da aikin Hajjin a shekarar da ta gabata.

Hukumomin kasar dai sun ce sun dau wannan mataki ne a matsayin wani mataki na dakile yaduwar cutar covid-19.