Cutar murar tsuntsaye ta ɓulla a Kano da wasu jihohi

Hukumar dakile yaduwar cutuka ta kasa NCDC ta ce, cutar murar tsuntsaye ta bulla a jihohi bakwai na Arewacin kasar, ciki har da jihar Kano.
Jaridar Daily Trust ta rawaito shugaban hukumar Chikwe Ihekweazu na bayyana hakan a jiya Talata.
A cewar sa, jihohin da cutar ta bulla sun hadar da, Kano da Bauchi, da jihar Plateau, sai kuma Gombe Nasarawa, da kuma jihohin Kaduna da Neja.
Shugaban ya ci gaba da cewa, ana kamuwa da cutar ne ta hanyar mu’amala da tsuntsayen da ke dauka da cutar, kuma ana iya yada ta, ta hanyar mutum da mutum idan ya yi tari ko atishawa.
Chikwe Ihekweazu yace, alamomin cutar na bayyana a cikin kwanaki biyu zuwa takwas, wanda suka hadar da mura da tari, ko sarkewar numfashi, da ciwon gabobi, har ma da ciwon kai.