Da yiyuwar mu ƙarawa ma’aikatan shara alawus ɗin da ake basu – Gwamna Abba

Gwamnatin Kano zata duba yiyiwar karawa ma’aikatan shara kudin alawus domin kyautata rayuwarsu.

Gwamna Abba Kabir Yusuf ne ya bayyana haka yayin ganawa ta musamman da ma’aikatan kwashe shara a dakin taro na Coronation dake gidan gwamnati.

Gwamna Abba wanda ya bayyana damuwarsa bisa korafe-korafen da ma’aikatan shara suka yi na tsaikon da ake samu wajen biyansu kudin alawus dinsu tsawon watanni, yace gwamnati zata yi bincike domin gano inda matsalar take da nufin maganceta cikin gaggawa.

Ya bawa ma’aikatan tabbacin gwamnati zata biyasu dukkanin basukan da suke bi tare da duba yiwuwar Kara musu kudin alawus nan bada dadewa ba.

Ya kuma yiwa ma’aikatan busharar cewa gwamnati zata tabbatar kowane ma’aikacin shara an tura shi aiki kusa da gidansa domin saukaka musu kashe kudi a wajen sufuri.