Dauda Lawal na PDP ya lashe zaben jihar Zamfara

Hukumar zabe ta Nijeriya INEC ta ayyana Dauda Lawal na jam’iyyar PDP a matsayin wanda ya lashe zaben gwamnan Jihar Zamfara, bayan da ya kayar da gwamna mai ci Muhammad Bello Matawalle na jam’iyyar APC.

Babban jami’in hukumar ta INEC a jihar Zamfara Kasim Shehu, ne ya sanar da sakamakon da tsakar daren Litinin din makon nan bayan kammala tattara alkaluman zaben.

Dauda Lawal na PDP, ya samu kuri’u dubu dari uku da saba’in da bakwai, da dari bakwai da ashirin da shida.

Shi kuwa gwamna Bello Matawalle na APC, ya samu kuri’u dubu dari uku da goma sha daya, da dari tara da saba’in da shida.