Eyitayo Jegede ya lashe zaben fidda gwani na gwamnan Jihar Ondo

Eyitayo Jegede mai lambar kwarewa ta SAN ya lashe zaben fidda gwani na takarar gwamna a Jihar Ondo, bayan doke abokan takararsa guda guda bakwai, ciki har da mataimakin gwamnan Jihar Agboola Ajayi, wanda ya fice daga jam’iyyar APC ya koma PDP.

Eyitayo Jegede ya samu kuri’u 888, inda wanda ya yi ma sa na biyu kuma mataimakin gwamna Agboola Ajayi ya samu kuri’u 657.

Sauran sun hadar Eddy Olafeso da ya samu kuri’u 175, Bode Ayirinde da ya samu kuri’u 95, yayin da Banji Okunomo ya samu kuri’u 90.

Eyitayo Jegede shi ne dantakarar gwamna a jam’iyyar PDP a shekarar 2016, wanda ya sha kayi a hannun gwamna mai ci Rotimi Akeredolu.