Fiye da wata hudu ba a samu mai dauke da cutar corona ba a Sokoto

Gwamnatin jihar Sokoto, ta sanar da cewar ba a samu bullar Annobar cutar Corona a fadin jihar na tsawon kwanaki 123.

Kwamishinan lafiya na jihar ta Sokoto Dr. Muhammadu Ali Inname, ne ya bayyana haka a wata ganawa da manema labarai kan halin da ake ciki dangane da yaki da cutar.

Dr Inname, wanda shi ne shugaban kwamitin yaki da cutar Corona na jihar yace kawo yanzu haka tun bayan wanda aka samu a baya suna da cutar su 775, tsawon kwanakin da aka shafe na 123 a jihar ba samu wanda suka kara kamuwa da cutar ba, da hakan ke nufin an samu raguwar cutar.

Kwamishinan, ya kara dacewa gwamnatin jihar ta yiwa mutum 17,440 a fadin jihar gwajin cutar ta Corona, a bangare daya kuma ta amince da kashe kudi sama da Miliyan 500, don siyar magungunan zazzabin Malaria.