Gambari ya gana da kwamitin binciken Magu

Shugaban ma’aikatan fadar shugaban kasa Farfesa Ibrahim Gambari ya yi wata ganawa ta musamman da ‘yan kwamitin shugaban kasa da ke bincikar zargin dakataccen shugaban hukumar EFCC Ibrahim Magu da aikata almundahana.

Rahotanni sun ce babu karin haske kan batutuwan da suka tattauna, sai dai ana ganin hakan baya rasa nasaba da batun binciken da suke yi kan Ibrahim Magu.

A jiya talata ne dai rahotonni suka bayyana cewa shugaban kasa Muhammadu Buhari ya dakatar da Ibrahim Magu daga mukaminsa na shugabancin hukumar yaki da cin hanci da rashawa ta EFCC.