Ganduje ya gamsu a bawa bangaren shari’a damar cin gashin kai

Gwamnan jihar Kano dakta Abdullahi Umar Ganduje ya ce ya gamsu da bin tsarin mulkin kasa kan bawa bangaren shari’ar damar cin gashin kanta.

Ganduje ya bayyana hakan ne yayin da kungiyar lauyoyi ta kasa reshen jihar Kano ta kai masa ziyara don neman amincewarsa tare da yin biyayya ga hukuncin kotu na tabbatar da cin gashin kai ga bangaren na shari’a.

Shugaban kungiyar reshen jihar Kano Aminu Gadanya ya ce “Kamar yadda kundin tsarin mulki ya tanadar da cin gashin kai ga bangaren shari’a hakan ya sanya muke kokarin ganin an tabbatar mana da shi.”

Gwamna Ganduje ya kuma ce, akwai tattaunawa da ake tsakanin fannin shari’a da kungiyar gwamnoni ta kasa kuma duk abinda suka yanke a kai ita jihar Kano zata amince da shi.

Haka zalika kungiyar ta mikawa gwamnan takaddar dake bukatar amincewa da cin gashin kan bangaren na shari’ar.