Garkuwa da mutane: An sako matar dagacin da aka sace a Kano

Ƴan bindiga sun sako matar dagacin garin Tsara na ƙaramar hukumar Rogo da ke Kano, bayan kwanaki 22 da sace ta.

Wani makusancin dagacin da ya nemi a sakaya sunansa, ya shaida wa Freedom Radio cewa, an sako matar bayan da aka biya kuɗi har miliyan biyu.

Ya ce “An tura wakilin dagaci da ɗan uwan matar domin su kai kuɗin zuwa dajin birnin gwari”.

Sai dai ƴan bindigar sun karɓe kuɗin tare da tsare mutanen.

A ranar Lahadi ne matar da wakilin dagacin suka samu kuɓuta.

Ya ce, har yanzu ɗan uwan matar yana hannun ƴan bindigar.

Shi kuma wakilin dagaci Malam Idi Liman yana asibitin garin Gwarzo sakamakon raunikan da suka yi masa.

Ita kuma matar dagacin Hajiya Asiya Shu’aibu, ana ci gaba sa bata kulawa a gida, kasancewar har kawo ranar Laraba ba ta dawo hayyacinta ba, a cewarsa.

Matar dagaci Hajiya Asiya Shu’aibu mai shekara 40.

A watan Janairun da ya gabata ma ƴan bindiga sun yi garkuwa da dagacin garin Karshi da ke ƙaramar hukumar ta Rogo.

Labarai masu alaka:

Masu garkuwa da mutane sun ɓulla a Kano

Wani matashi yayi garkuwa da wani yaro a Kano