Gwajin Korona: An dage dawowa gasar kwallon kafa ta mata a Najeriya

An dage dawowa ci gaba da wasannin rana ta biyar a gasar kwallon kafa ta mata a Najeriya sakamakon rashin cika ka’idojin gwajin cutar Korona a tsakanin kungiyoyin dake buga gasar.

Hakan na kunshe cikin wata sanarwa dasa hannun babban jami’in dake kula da shirya gasar Faith Ben-Anuge ya fitar game da ranar dawowa ci gaba da gasar.

A baya dai an tsaida ranar goma sha daya ga watan Janairu domin dawowa fagen gasar kafin daga bisani a dage zuwa ranar goma sha uku ga watan na Janairu.

Ben-Anuge, ya ce, an baiwa kowace kungiya wa’adin mako guda don gudanar da gwajin cutar Korona ga ‘yan wasa da kuma ma’aikanta tare da tura sakamakon gwajin ga hukumar gudanar da gasar kafin ranar dawowa.

Ya kuma gargadi kungiyoyin da su bada hadin kai wajen kawo musu sakamakon gwajin domin rashin yin hakan ka iya sanya a dakatar da kowace kungiya daga ci gaba da gasar.