Gwamna Abba Kabir ya raba takardun daukar aiki ga sabbin jami’an lafiya 2,037

Gwamnan Kano, Alhaji Abba Kabir Yusuf, ya gargaɗi sabbin jami’an lafiya 2,037 da aka ɗauka aiki da su guji cin zarafin marasa lafiya ko karɓar na Goro kafin ba su kulawar da ta dace.

Da ya ke jawabi yayin ƙaddamar da rabon takardun ɗaukar aikin, Gwamna Abba Kabir Yusuf ya ce lokacin neman kuɗi kafin a kula da majiyyaci ya wuce, don haka ya buƙaci ma’aikatan da su gudanar da aikinsu cikin gaskiya, tausayi, ladabi da ƙwarewa.

Wasu daga cikin sabbin ma’aikatan sun bayyana farin cikinsu da samun aikin na dindindin, inda suka bayyana cewa hakan zai ba su damar samun kwanciyar hankali tare da ci gaba da yi wa al’ummar jihar hidima.

Sabbin ma’aikatan sun kuma yi alkawarin gudanar da aikinsu cikin gaskiya da kishin al’umma, tare da amfani da damar da aka ba su wajen inganta harkar kiwon lafiya.

Wadanda aka dauka aikin sun haɗa, da likitoci 250, ma’aikatan jinya 250, ungozoma 250, sai masu aikin ba da magani su 40, da manyan ma’aikatan lafiya na al’umma 150.