Afirka ta Kudu ta gayyaci jakadan domin ya ta bahasi kan sukar gwamnatin kasar

Gwamnatin Afirka ta Kudu ta gayyaci jakadan Amurka Brent Bozell, domin ya ba da bahasi kan sukar gwamnatin kasar da ya yi a yayin wasu hirarraki da wasu kafafen yada labarai.

Wani jami’i a ma’aikatar harkokin wajen Afirka ta Kudu ya ce wannan ne karo na uku da ake gayyatar mista Bozell, tun bayan nadin sa a matsayin jakada a 2025, saboda dabi’u da yake nunawa wadanda suka sabawa diflomasiyya. 

Rahotonni sun bayyana cewa, Shi dai Brent Bozell ya kasance mai ra’ayin mazan jiya, kuma Trump ya nada shi jakada ne a daidai lokacin da dangantaka ta fara yin tsami a tsakanin Afirka ta Kudu da Amurka, musamman saboda batun shigar da karar Isra’ila a gaban kotun ICC da fadar mulki ta Pratoria ta yi kan zargin aikata kisan kare dangi a zirin Gaza.

Haka kuma shugaban Amurka Donald Trump na zargin mahukuntan Afirka ta Kudu da muzgunawa manoma farar fata da ake wa lakabi da ‘Afrikaners‘. 

Wannan dambarwa na zuwa ne makonni kadan bayan da Amurka ta sanar da daukar matakin takaita ba da biza ga wasu ‘yan Afirka ta Kudu a ranar 15 ga Satumba, ciki har da masu wanzar da dabi’ar wariyar launin fata.