Gwamna Matawalle ya jagoranci sumame da jami’an tsaro suka kai maboyar ƴan bindiga

Gwamnan jihar Zamfara Bello Matawalle ya jagoranci wata tawagar jami’an tsaro don kai sumame wata maɓoyar ƴan bindiga da ke birnin Gusau babban birnin jihar.

A yayin sumamen rahotanni sun ce jami’an tsaron sun kama wani gawurtaccen ɗan bindiga wanda ya jima yana aikata ta’addanci ga al’ummomin birnin Gusau.

Rahotanni sun ce gwamna Matawalle shi da kansa ya rika bai wa jami’an tsaro umarnin yadda za su kai sumame maɓoyar ƴan ta’addar.

Harin da ya faru tsakanin ƙarfe 10 zuwa ƙarfe 5 na safiya ya sa jami’an ƴan sanda da jami’an kashe gobara sun yi nasarar cafke da yawa daga cikin ƴan bindigar.

Wata majiya da ta fito daga fadar gwmnatin jihar ta tabbatar da cewa gwamnan yasha alwashin fatattakar ƴan ta’adda daga jihar ta zamfara.