Gwamnatin jihar Kaduna ta sake bude wata makaranta da ta rufe saboda karya ka’idojin COVID-19 sama da shekara guda

Bayan shafe sama da shekara guda a ranar Alhamis gwamnatin jihar Kaduna ta dage dakatarwar da ta yi wa wata makaranta mai zaman Kanta dake Unguwan Rimi, a jihar.

Babban Sakataren ma’aikatar ilimi Dakta Yusuf Saleh ne ya bayyana hakan a wata sanarwa da ya fitar a ranar Alhamis din.

Yace tunda fari dai gwamnatin jihar ta rufe makarantar ne sakamakon karya dokokin Corona.

Tun a ranar 11 ga watan Yunin shekarar da ta gabata ta 2020 gwamnati ta kwace lasisin makarantar tare da rufe ta saboda rashin bin dokokin kare kai daga cutar Covid-19 a jihar.