Gwamnatin Kano ta bukaci gwamnatin tarayya ta biya ta kudaden rarar Iskar Gas

Gwamnatin jihar Kano ta bukaci Gwamnatin Tarayya da ta sakar mata kasonta na rarar kudade daga tsarin iskar Gas na kasa  NLNG na tsawon shekaru 25 da suka gabata.

Hakan na kunshe a cikin  wata wasika da Gwamna Abba Kabir  Yusuf, ya aika wa shugaban majalisar dokokin Kano, Alhaji Jibril Ismail Falgore,  inda  ya bukaci  majalisar kan ta shiga tsakani domin saukaka karbo rarar kudaden wanda hakkin jihar Kano ne tun daga watan Janairun 1999 zuwa yanzu.

Ta cikin wasikar, wadda kakakin majalisar ya karanta a zauren majalisar a zamanta na jiya  Talata, gwamnan ya ce, in majalisar ta amince da kudurin, zai saukaka nemo masalaha don bin hanyoyin da suka dace domin karbo kudaden da aka tara na tsawon shekaru.

Da yake mayar da martani kan wasikar, shugaban masu rinjaye na majalisar, Lawan Husseini, ya jaddada cewa kudurin majalisar shi ne hanyoyin  samun kudaden, yana mai bayyana cewa, hakan zai bai wa kungiyar gwamnoni damar daukar shawarwarin da suka dace domin amso kudaden,  zuwa jihohi.