Har yanzu bamu tsayar da ranar fara rajistar jarabawa ba-JAMB

Hukumar shirya jarrabawar shiga manyan makarantun kasar nan (JAMB) ta ce har yanzu ba ta tsayar da lokacin fara rajistar rubuta jarrabawar shiga makarantun gaba da sakandire ta bana ba (UTME).

A don haka hukumar ta shawarci jama’a da su kaucewa wani shafin tiwita na bogi da ke bayar da sanarwar sanya ranar rubutawar.

Wannan na cikin wata sanarwa da mai magana da yawun hukumar ta JAMB Dr Fabian Benjamin ya fitar a yau.

A gefe guda kuma a jiya ne hukumar ta fitar da sanarwar cewa za ta kammala aikin bayar da guraben karatu a manyan makarantun kasar nan a ranar 15 ga watan Yuni mai zuwa.