Hukumar Hizbah a jihar Jigawa ta lalata kwalaben barasa

Hukumar Hizbah ta Jihar Jigawa ta ce ta lalata kwalaben barasa guda 588 da kwace a karamar huumar Ringim ta Jihar.

Kwamandan hukumar Malam Ibrahim Dahiru ne ya shaida hakan yau yayin zantawa da manema labarai a birnin Dutse, yana mai karin hasken cewa sun gudanar da aikin ne a ranar alhamis din da ta gabata.

Malam Ibrahim Dahiru ya ce shan barasa a Jihar baki-daya haramun ne, a don hakan hukumar ba za ta yi kasa a gwiwa ba wajen yaki da masu aikata miyagun dabi’u a Jihar, ciki har da masu ta’ammali da barasa.

Sannan kuma ya shawarci al’ummar jihar da su kaucewa aikata munanan ayyukan da ka iya lalata rayuwarsu da ta sauran al’umma.