Ina nan a jam’iyyar APC – Murtala Sule Garo

Ɗan takarar mataimakin Gwamna a jam’iyyar APC Alhaji Murtala Sule Garo ya musanta rahoton cewa ya fice daga jam’iyyar APC.

Murtala Garo ya shaida wa Freedom Radio cewa, yana nan daram a cikin jam’iyyar APC bai sauya sheƙa ba.

Ya ce “Ƙarya ne, ni yanzu ma (ƙarfe biyu na daren Talata) meeting muke yi da Gwamna, ƙarya ce kawai mutane suke yaɗawa”.

Wannan dai ya biyo bayan rahotonnin da aka riƙa yaɗawa a kafafen sada zumunta cewa ya fice daga jam’iyyar APC zuwa PDP a kafafen sada zumunta.

Murtala Garo wanda shi ne tsohon Kwamishinan ƙananan hukumomi na Kano, na cikin ƴan gabada-gabadai ɗin Gwamna Ganduje.

A baya dai Murtalan ya ajiye muƙaminsa ne domin yin takarar Gwamna, kafin daga bisani jam’iyyar tayi maslaha inda ta tsayar da mataimakin Gwaman mai ci Alhaji Nasiru Yusuf Gawuna, tare da Murtalan a matsayin mataimaki.