Zaben Alhassan Ado Doguwa bai kammalu ba- INEC

Hukumar zabe mai zaman kanta ta Nijeriya INEC, ta bayyana zaben dan majalisar tarayya na mazabar Doguwa da Tudunwada a matsayin wanda bai kammalu ba.

Hukumar ta bayyana hakan ne a yau Laraba soke zaben ne sabo da an samu akwatuna 13 da aka soke inda kuri’un su suka kai 6,917.

Tun a baya dai jam’iyyar APC na da kuri’a 39,732 yayin da NNPP ke rufa mata baya da guda 34,718

wanda alkaluman ke nuni da cewa, kuri’un da aka soke din sun fi wadanda APC ta bai wa NNPP tazara.

Bisa haka ne Baturan zaben kananan hukumomin Farfesa Ibrahim Adamu Yakasai, ya bayyana sakamakon zaben a matsayin wanda bai kammalu ba.

Haka kuma Farfesa Ibrahim Adamu Yakasai, ya ce, za a sake zabe tsakanin NNPP da APC a Mazabu 13 da aka soke.