Kamfanin NNPC ya rufe karbar masu neman aiki a hukumar a jiya

Kamfanin mai na kasa NNPC ya rufe karbar rajistar masu neman aiki a hukumar a jiya Laraba tare da fara tantance wadanda suka fi cancanta.

Hakan na kunshe ne cikin wata sanarwa da mai magana da yawun  hukumar Mr Ndu Ughamadu ya fitar jiya a Abuja.

Sanarwar ta ce kamfanin ya kammala tattara kididdigar wadanda su ka yi rajista don neman aiki a kamfanin na NNPC, abinda ya rage yanzu shine fara tantance su don zabar wadanda suka fi cancanta.

Ndu Ughamadu ta cikin sanarwar dai ya kuma ce wadanda aka tantance kuma suka fi cancanta za a gayyace su don rubuta jarabawar gwajin kwazonsu wato Aptitude test.

A cewar sanarwar za a gudanar da jarabawar gwajin kwazon ne a cibiyoyi hamsin da ke kasar nan.