Kano: An cafke ƴan adaidaitar sahun da suka shirya zanga-zanga

Ƴan sanda sun cafke wasu mutane biyu da ake zargi da shirya zanga-zangar masu baburan adaidaita sahu a Kano.

Mai magana da yawun rundunar ƴan sandan Kano DSP Abdullahi Haruna Kiyawa ne ya bayyana hakan.

Ya ce, sun kama mutane biyun ne suna raba takardu domin gayyatar masu adaidaita sahu su shiga zanga-zanga a ranar Litinin.

Kiyawa ya gargaɗi duk wasu masu yunƙurin shirya wata zanga-zanga da su kaucewa hakan domin gudun tayar da hankalin jama’a.

Ya kuma ce, ƴan sanda sun shirya tsaf domin daƙile duk wani yunƙuri da zai kawo rashin zaman lafiya da sunan zanga-zanga.