Kano: Babbar Kotu ta bayar da belin lauyan da ake zargi da yin damfara

Babbar kotun jihar Kano ta bayar da belin Barrister Dalhatu Shehu Usman, wanda ake zarginsa aikata damfara da kuma ƙirƙirar takardun rasiti na bogi.

Mai shari’a Zuwaira Yusuf, ce ta bayar da belin nasa a yau Juma’a, bayan kotun ta yi watsi da ƙalubalen da lauyoyin wanda ake ƙara suka gabatar kan sahihancin izinin da babban lauyan gwamnatin jihar ya bayar domin gurfanar da shi.

Lauyan ma su ƙara, R.O. Zakariya, ya yi nasarar shawo kan kotun cewa rashin saka lambar shari’a a takardar izinin gurfanar da wanda ake zargin ba ya sa takardar ta zama ba ta da inganci, inda daga nan aka karanta wa wanda ake zargin tuhume-tuhume biyu, inda ya musanta aikata laifukan.

Jaridar SolaceBase, ta ruwaito cewa, mai gabatar da ƙara ya ƙi amincewa da bayar da belin, bisa hujjar cewa a baya wanda ake zargin ya gaza bayyana a gaban kotun, lamarin da ya sa aka bayar da sammacin kama shi, amma duk da haka, kotun ta amince da ba da belinsa tare da ɗage shari’ar zuwa ranar 9 ga watan Disamban  domin fara sauraron shari’ar.