Kano Pillars za ta biya tarar sama da naira miliyan 7 – LMC

Kamfanin dake shirya gasar League ta kasa LMC, ya ci tarar kungiyar kwallon kafa ta Kano Pillars naira miliyan 7 da dubu dari 5 bisa tada hargitsi da magoya bayansu suka yi.

A ranar Lahadin data gabata ne 13 ga watan Yuni, aka zargi magoya bayan Pillars da tada hargitsi yayin da kungiyar take wasa da Akwa United a cigaba da gasar League ta kasa a jihar Kaduna.

LMC ta ce Pillars za ta biya tarar naira miliyan 5 bisa karya dokar dakile yaduwar cutar COVID-19, sai kuma tarar naira miliyan 2 da dubu dari 5 kan tayar da hargitsi da magoya bayan kungiyar suka yi, lamarin da ya saka aka tashi daga wasan ba tare da an kammala ba.

Haka zalika, an dai karkare wasa ne da safiyar ranar Litinin 14 ga watan Yuni.

LMC ta kuma yi barazanar cire maki 3 a cikin makin da Pillars ta samu, matukar hakan ta sake faruwa.