Kano: Yan sanda sun gurfanar da matasa 104 da ake zargi da ayyukan Daba

Rundunar yan sandan jihar Kano, ta gurfanar da matasa 104 da ake zargin yan Daba ne a gaban wasu kotuna da ke unguwar Nomandsland.

Mai magana da yawun rundunar, SP Abdullahi Haruna Kiyawa, ne ya bayyana hakan a sahihin shafinsa na Facebook.

SP Kiyawa, ya kara da cewa ana zargin mutanen da laifukan Daba da riƙe makamai da kuma tu’ammali da miyagun ƙwayoyi.

Haka kuma, ya ce sun gurfanar da mutanen ne bayan binciken da aka yi a sashen binciken manyan laifuka na rundunar kamar yadda kwamishinan ƴan sandan jihar, CP Mohammed Usaini Gumel ya umarta.