Kano: Yau ake sa ran samun sakamakon gwajin sabuwar cutar fitsarin jini

Ma’aikatar lafiya ta jihar Kano ta ce, a Talatar nan ake sa ran samun sakamakon gwajin da aka yiwa masu ɗauke da cutar fitsarin jini da ta ɓulla a Kano.

Babban jami’in kwamitin kar-ta-kwana mai yaƙi da cutuka masu yaɗuwa na ma’aikatar Dr. Bashir Lawan ne ya bayyana hakan ga Freedom Radio.

Ya ce, an ɗauki gwajin mutanen da kuma na sinadaran da ake zargin su ne suka haifar da cutar, ana kuma sa ran sakamakon ba zai wuce ranar Talata ba.

Ya ƙara da cewa, a Talatar nan za a samu cikakken bayani game da cutar matuƙar aka samu sakamakon gwaje-gwajen.