KAROTA ta baiwa jami’in ta kyautar kudi mai tsoka

Hukumar KAROTA ta jihar Kano ta baiwa wani ma’aikacin ta dake kula da shukokin hukumar kyautar naira dubu dari sakamakon kokarinsa wajen kula dasu.

Jami’in hukumar mai suna Ahmad Aminu da aka fi sani da suna Kurungu ya bayyana jin dadinsa  a ya yin zantawarsa da wakilin Radio Freedom Abdulkarim Muhammad Abdulkarim Tukuntawa yau a hukumar.

Ahmad Aminu ya kuma kara da cewa ya shafe sama da shekaru shida yana aikin kula da shuke-shuke a hukumar ta KAROTA wanda hakan yasa shugaban hukumar ya bashi wannan kyautar kudi masu yawa.

Ahmad Aminu yace bayan ya karbi kyautar kudin daga shugaban hukumar KAROTA Baffa Babba Danagundi, shima ya dauki naira dubu talatin ya baiwa abokinsa da suke aikin tare ya kuma sake rarrabawa sauran abokan aikinsa na gidan wasu daga cikin kudin domin su sanya masa albarka.

Ahmad Aminu ya kuma sha alwashin cigaba da hidimtawa hukumar dukkannin shuke-shuke na KAROTA, kasancewar dama an dauke shine domin yai musu hidima.