KSCPC ta kama gurɓataccen Tumaturin gwangwani

Hukumar kare haƙƙin masu sayen kaya ta jihar Kano KSCPC da haɗin gwiwar hukumar KAROTA sun cafke wata mota maƙare da gurɓataccen Tumaturin gwangwani.

Lamarin ya faru ne da misalin ƙarfe 11:56 na daren Talata, a kasuwar Singa.

Mai taimakawa Gwamnan Kano kan KAROTA Malam Nasir Usman Na’ibawa wanda ke jagorantar sumamen ya ce, yawan Tumaturin da suka kama ya kai katan 368.

A cewar sa, gurɓatacce ne da wa’adin amfani da shi ya ƙare, saboda haka hukumomin za su ci gaba da bincike domin ɗaukar mataki na gaba.