Ku rika yiwa ƴaƴanku gwajin ta’ammali da miyagun ƙwayoyi kafin a ɗaura musu aure – Buba Marwa

Shugaban hukumar yaƙi da sha da fataucin miyagun ƙwayoyi ta ƙasa NDLEA Burgediya janar Muhammad Buba Marwa mai ritaya, ya yi kira ga iyaye a ƙasar nan da su tabbata an yiwa ƴaƴansu gwajin ƙwayoyi kafin a ɗaura musu aure.

A cewar shugaban hukumar ta NDLEA yin hakan zai taimaka gaya wajen rage matsalar ta’ammali da miyagun ƙwayoyi da ya yi ƙamari tsakanin al’ummar ƙasar nan.

Burgediya janar Buba Marwa mai ritaya ya bayyana hakan ne yayin wani taron masu ruwa da tsaki kan yadda za a daƙile ta’ammali da miyagun ƙwayoyi da ya gudana a garin Lokoja da ke jihar Kogi.

Shugaban hukumar ta NDLEA ya kuma ce ko da matsalar tsaro da ke addabar ƙasar nan a wannan lokaci na alaƙa ne da ta’ammali da miyagun ƙwayoyi.