Ku sauya matsugunin sojinku da ke kula da afurka daga jamus zuwa Afurka – Buhari ga Amurka

Shugaban kasa Muhammadu Buhari ya bukaci kasar Amurka da ta sauya matsugunin shalkwatar sojinta da ke kula da nahiyar afurka (AFRICOM) daga birnin Stuttgart na Jamus zuwa nahiyar afurka.

A cewar shugaba Buhari wannan mataki zai taimakawa rundunar damar sanya idanu kan harkokin tsaro a nahiyar afurka.

Muhammadu Buhari ya bayyana hakan ne yayin zantawa da sakataren harkokin wajen amurka Mr. Anthony Blinken ta kafar internet.

A cikin wata sanarwa mai dauke da sa hannun mai bai wa shugaban kasa shawara kan harkokin tsaro Femi Adesina ta ruwaito shugaba Buhari na cewa, yankin yammaci, tsakiya da arewacin afurka na fuskantar kalubalen tsaro mai yawa.