Kungiyoyin kwadagon Faransa na shirin gudanar da zanga-zangar neman karin albashi

Kungiyoyin kwadago a kasar Faransa sun ce za a gudanar da zanga-zanga domin neman karin albashi da kuma nuna adawa da rage kasafin tallafin jin dadi da walwalar al’umma.

Hukumomi na sa ran dubban mutane za su halarci gangamin, yayin da ake kokarin shirya babban yajin aikin gama gari a fadin kasar.

An dai tura jami’an tsaro da dama domin hana tashe-tashen hankula irin wadanda suka faru a zanga-zangar da aka yi a watan Oktoba na wata jiya.

Ana sa ran ma’aikatan gwamnati za su shiga yajin aikin, sai dai har yanzu ba a tabbatar da irin tasirin da hakan zai yi ga harkokin sufuri ba.

Kungiyar yellow vest  da kuma kungiyoyin dalibai sun mara wa zanga-zangar baya, bayan sun gudanar da gangami a karshen makonnin baya domin nuna adawa da tsadar rayuwa da kuma neman inganta harkar ilimi.