Kyan Hali: Ɗan jarida ya mayar da sama da miliyan guda da ya tsinta

Wani ɗan jarida a jihar Gombe ya mayar da kuɗi har Dala dubu uku ($3000) da ya tsinta.

Ɗan jaridar mai suna Abdulƙadir Shehu Aliyu, ɗan asalin jihar Kano ne, kuma tsohon ma’aikacin Freedom Radio wanda ya ke aiki a gidan rediyon Progress FM, ya yi cigiyar tsuntuwar a gidan rediyo, inda daga bisani aka samu mai kuɗin.

Adadin kuɗin a Naira ya kama miliyan ɗaya da dubu ɗari biyu da ashirin da biyar da ɗari tara da tamanin N1,225,980.

A wani saƙo da ya wallafa a shafin sa na Facebook yayi godiya ga Allah inda ya bayyana cewa an samu mai kuɗin har ma ya karɓi abin sa.

Yanzu haka dai wannan labari ya fara ɗaukar hankalin jama’a a kafafen sada zumunta, ga na ra’ayoyin wasu daga ciki.